دلی میں کورونا متاثرین کی تعداد 3515 ہوئی، آزادپور منڈی کی13 دوکانیں سیل

راجدھانی میں جمعرات کو کورونا متاثرین کے 76 نئے سامنے آنے سے متاثرین کی کل تعداد بڑھ کر 3515 ہوگئی ہے۔
دلی حکومت کے محکمہ صحت کی جانب سے دیر رات جاری اعداد و شمار میں بتایا گیا ہے کہ قومی راجدھانی میں کووڈ۔ 19 سے تین مریضوں کی موت ہونے سے مہلوکین کی تعداد 59 ہوگئی ہے۔
دوسری جانب آج دو مریض صحت مند بھی ہوئے ہیں اس کے ساتھ ہی اب تک 1094 افراد کورونا وائرس سے جنگ جیت چکے ہیں۔ وہیں یہاں پر کورونا کے سرگرم معاملوں کی تعداد 2362 ہے۔
ادھرقومی راجدھانی کے آزاد پور میں واقع ایشیا کی سب سے بڑی سبزی اور پھلوں کی خوردہ منڈی میں 15 لوگوں کو کورونا پازیٹیو پائے جانے کے بعد یہاں کی 13 دوکانیں سیل کردی گئی ہیں۔
زرعی پیداوار کی مارکیٹنگ کمیٹی کے صدر نے جمعرات کی رات کو بتایا کہ ضلع انتظامیہ نے 15 لوگوں کے کورونا پازیٹیو پائے جانے کی تصدیق کی ہے۔ متعلقہ ٹیم کورونا متاثرین کے رابطے میں آنے والوں کی بھی جانچ کی جارہی ہے۔
ابھی تک منڈی کی 13 دکانیں سیل کردی گئی ہیں اور 43 لوگوں کو کوارنٹین کیا گیا ہے۔ بازار یونین کوارنٹین کئے گئے لوگوں کے لئے کھانے اور دیگر ضروری سہولیات کا انتظام کررہی ہے۔ بازار کو باقاعدہ طور پر سنیٹائز کیا جارہا ہے۔