کورونا کے وقت ہر انسان میں نظر آرہی ہے خیر سگالی: امیتابھ

ممبئی: بالی ووڈ کے سپر اسٹار امیتابھ بچن کا کہنا ہے کہ کورونا کی وجہ سے لوگ ایک دوسرے کے بارے میں سوچنے لگے ہیں اور ایسی خیر خواہی پہلے نہیں دکھائی دی ہے۔
امیتابھ بچن سوشل میڈیا پر کافی سرگرم ہیں۔ وہ اکثر عصری امور پر بھی اپنی رائے کا اظہار کرتے نظر آتے ہیں۔ امیتابھ مسلسل لوگوں کو کورونا وائرس کے بارے میں آگاہ کررہے ہیں۔انہوں نے سوشل میڈیا پر ایک نیا پوسٹ شیئر کیا ہے۔ انہوں نے اپنی پرانی اور نئی فوٹو کا ایک کولاج شیئر کیا ہے۔ ایک تصویر میں وہ فون پر بات کرتے نظر آرہے ہیں تو دوسری تصویر میں وہ ہاتھوں سے فون کی جانب اشارہ کررہے ہیں۔
امیتابھ نے لکھا ”ایک بات تو طے ہے اس کورونا کے دوران، جتنی خیرخواہی انسان نے انسان کو دکھائی ہے شاید پہلے کبھی نہیں دیکھی گئی۔ آپ کسی بھی ملک، صوبے، معاشرے، رنگ، ذات، مذہب، کے ہوں؛ ہر طرف سے بس ایک ہی آواز گونج رہی ہے، سب کے لئے، سب سے …. آپ ٹھیک ہو، محفوظ ہوں“۔