بلنکن نے حمدوک کی رہائی کا خیرمقدم کیا

واشنگٹن، 27 اکتوبر: امریکی وزیر خارجہ انٹونی بلنکن نے سوڈانی وزیر اعظم عبداللہ حمدوک سے ٹیلی فون پر بات چیت کی ہے اور ان کی رہائی کا خیرمقدم کیا ہے۔
محکمہ خارجہ کے ترجمان نیڈ پرائس نے ایک نیوز کانفرنس کو بتایا کہ مسٹر بلنکن نے مسٹر حمدوک کی رہائی کا خیرمقدم کیا اور سوڈان کی فوجی فورسز پر زور دیا کہ وہ دیگر سیاسی قیدیوں کو بھی رہا کریں۔
مسٹر پرائس نے بتایاکہ مسٹر بلنکن اور مسٹر حمدوک نے بات چیت کی اور بین الاقوامی برادری نے اجتماعی طور پر فوج کے اقتدار پر قبضے کی مذمت کی۔
انہوں نے کہا کہ مسٹر بلنکن نے سوڈانی وزیر اعظم کے ساتھ بات چیت میں اقتدار پر قبضے اور سوڈانی فوج کو مظاہرین پر طاقت کے استعمال پر گہری تشویش کا اظہار کیا۔ انہوں نے ایک بار پھر سویلین حکومت کی بحالی کی ضرورت پر زور دیا ہے۔