کووڈ ۔19 سے امریکہ میں 1.08 لاکھ افراد ہلاک

مہاراشٹر، گجرات اور دہلی میں کورونا سے 71.12 فیصد ہلاکتیں
نئی دہلی: مہاراشٹر، دہلی اور گجرات میں اب تک کورونا وائرس سے 4515 افراد کی موت ہوچکی ہے جو مجموعی اموات کا 71.12 فیصد ہے۔ جمعہ کو وزارت صحت کی جانب سے جاری اعداد و شمار کے مطابق گذشتہ 24 گھنٹوں کے دوران ملک میں کورونا وائرس کے 9851 نئے کیسز سامنے آئے ہیں، جس کے بعد متاثرین کی مجموعی تعداد 226770 ہوگئی ہے۔ ملک میں اس وبا سے مجموعی طور پر 6348 افراد ہلاک اور 109462 افراد شفایاب ہوئے ہیں۔
کووڈ ۔19 سے امریکہ میں 1.08 لاکھ افراد ہلاک
واشنگٹن: امریکہ میں کورونا وائرس سے 1.08 لاکھ سے زائد افراد فوت ہوچکے ہیں۔ امریکہ میں اس وبا نے شدید شکل اختیار کرلی ہے اور اب تک 18 لاکھ سے زیادہ افراد اس کی زد میں آچکے ہیں۔ جان ہاپکنز یونیورسٹی کی جانب سے جاری تازہ ترین اعداد و شمار کے مطابق، امریکہ میں کورونا وائرس سے ہلاکتوں کی تعداد ایک لاکھ سے تجاوز کرکے 108208 ہوگئی ہے، جبکہ متاثرین افراد کی تعداد 18 لاکھ سے تجاوز کر کے 1872528 ہوچکی ہے۔ امریکہ میں ساڑھے چار لاکھ سے زیادہ افراد کورونا وائرس سے پوری طرح صحت یاب ہوئے ہیں۔
نائجیریا: فوج کی مہم میں 392 بندوق بردار ہلاک
ابوجا: نائیجیریا کی فوج کے مطابق اس نے کئی دنوں سے جاری ایک بڑی مہم میں 392 بندوق برداروں کو ہلاک کیا ہے۔ جمعرات کو فوج کے ترجمان جان انیچے نے میڈیا کو یہ اطلاع دی۔ جان انیچے کے مطابق 14 مئی کو فوج نے پولیس کے ساتھ شمال مغربی صوبہ کتسینا میں پولیس کے ساتھ مشترکہ آپریشن چلایا۔ اس کا مقصد ملک کے شمالی خطے میں ڈاکوؤں اور دیگر جرائم کے خطرات کو ختم کرنا تھا۔ اس کارروائی کے دوران سیکورٹی فورسز نے بنیادی طور پر دونوں علاقوں میں سینکڑوں بندوق برداروں کو ہلاک کردیا۔ یکم جون کو سیکورٹی فورسز نے بقیہ بندوق برداروں کا صفایا کردیا۔
فوج کے ترجمان کے مطابق ’’ملک کے شمال مغربی اور شمال وسطی علاقوں میں ڈاکوؤں اور دیگر مجرمانہ سرگرمیوں سے نمٹنا ایک بڑا چیلنج بن گیا تھا۔ اس سلسلے میں متعدد اہداف کی نشاندہی کی گئی اور بندوق برداروں کو زمینی اور فضائی حملوں کے ذریعے ختم کیا گیا۔
ایران نے کیے امریکی فوجی آزاد، ٹرمپ کا اظہار تشکر
واشنگٹن:ایران کی جانب سے امریکی فوجی آزاد کرنے پر صدر ڈونلڈ ٹرمپ نے ایران کا شکریہ ادا کرتے ہوئے کہا ہے کہ لگتا ہے معاہدہ ممکن ہے۔ ڈونلڈ ٹرمپ نے سوشل میڈیا پر ایک پیغام میں لکھا کہ جب سے وہ صدر بنے ہیں 40 سے زائد امریکی قیدیوں یا یرغمالیوں کو واپس لایا جا چکا ہے۔ انہوں نے ایران کی جانب سے رہا کیے گئے امریکی فوجی قیدی سے فون پر بات کرنے کی بھی تصدیق کی اور لکھا کہ مائیکل وائٹ بہت جلد امریکا پہنچ جائے گا۔ غیر ملکی خبر رساں ایجنسی کے مطابق امریکی نیوی اہلکار مائیکل وائٹ کی رہائی ایرانی سائنسدان سائرس اصغری کی رہائی کے بعد عمل میں آئی ہے۔