کورونا کو روکنے میں ہائیڈروکسی کلوروکوین کا استعمال کیا جاسکتا ہے: روس

روس کی وزارت صحت نے ہائیڈروکسی کلورو کوین کو کورونا وائرس کی روک تھام کے لئے ایک دوا کے طور پر استعمال کئے جانے کی سفارش کی ہے۔

وزارت صحت نے کورونا وائرس کے علاج پر تازہ سفارشات میں اس بارے میں سفارش کی ہے۔ وزارت نے کہا کہ اگر یہ دوا دستیاب نہیں ہے تو اس کی جگہ میفلو کوین استعمال کی جاسکتی ہے۔
وزارت صحت کے دستاویز میں کہا گیا ہے کہ ’’ہائیڈروکسی کلوروکووین کو کیمو روک تھام کا ایک ذریعہ مانا جاتا ہے۔ اگر یہ دستیاب نہیں ہے تو میفلو کووین کا استعمال کیا جاسکتا ہے‘‘۔

واضح رہے کہ امریکہ سمیت کئی ممالک ہائیڈروکسی کلوروکووین کو کورونا کی روک تھام کے لئے کارگر دوا مانتے ہیں۔ ہندوستان میں تیار ہونے والی اس دوا کے سلسلے میں عالمی پیمانے پر بحث جاری ہے اور اب روز کے بیان کے بعد ایک نئی بحث کی شروعات ہوسکتی ہے۔ امریکہ نے اس دوا کی درآمدات کے لئے بھی ہندوستان پر دباؤ بنایا تھا۔

کئی ممالک کے طبی ماہرین اس رائے سے متفق نہیں ہیں کہ کوروناکے علاج میں ہائڈروکسی کلورو کووین کارآمد ثابت ہو سکتی ہے۔ امریکہ کہ کئی طبی ماہرین بھی اس دوا کے استعمال کے حق میں نہیں ہیں۔ واضح رہے روس میں کورونا کے کیسوں میں زبردست اضافہ ہو رہا ہےاور وہ دنیا میں متاثرین کی تعداد کو لے کر تیسرے نمبر ہے۔

روس کی وزارت دفاع نے کل اعلان کیا تھا کہ اس نے کورونا کے علاج کے لئے ویکسین تیار کر لی ہے اور وہ اس کا ٹرائل فوجی رضاکاروں پر کرنےجا رہی ہے۔