مشہور میوزک ڈائریکٹر واجد خان کا ممبئی میں انتقال

بالی ووڈ کے مشہور میوزک ڈائریکٹر واجد خان کا 42 سال کی عمر میں پیر کے روز انتقال ہو گیا۔ ان کی موت کی خبر کئی بالی ووڈ ہستیوں نے سوشل میڈیا سائٹس کے ذریعہ دی۔ پرینکا چوپڑا نے اپنے ٹوئٹر ہینڈل پر لکھا کہ ”افسوسناک خبر۔ ایک بات جو مجھے واجد بھی کی ہمیشہ یاد رہے گی، وہ ہے ان کی ہنسی۔ وہ ہمیشہ مسکراتے رہتے تھے۔ وہ بہت جلد اس دنیا سے چلے گئے۔ میری ہمدردی ان کے اہل خانہ کے ساتھ ہے۔ میری یادوں اور دعاؤں میں تم ہمیشہ یاد رہو گے۔“ قابل ذکر ہے کہ ساجد-واجد کی جوڑی بالی ووڈ کی مشہور میوزک ڈائریکٹر جوڑیوں میں سے ایک ہے۔