دہلی سے آج رات 8 بجے روانہ ہوگی پہلی مزدور اسپیشل ٹرین

دہلی سے پہلی مزدور اسپیشل ٹرین آج رات 8 بجے مدھیہ پردیش کے لیے ہوگی روانہ
دہلی سے مہاجر مزدوروں کو لے کر پہلی مزدور اسپیشل ٹرین آج مدھیہ پردیش کے چھتر پور کے لیے روانہ ہوگی۔ یہ ٹرین آج رات 8 بجے چلے گی۔ اس ٹرین سے 1200 مزدور جائیں گے۔ یہ مہاجر مزدور دہلی کے الگ الگ رین بسیروں میں ٹھہرے ہوئے ہیں۔

ہندوستان میں تیزی سے بڑھ رہی مہلوکین کی تعداد، اب تک 1783 ہلاک
ہندوستان میں کورونا انفیکشن سے ہلاک ہونے والے مریضوں کی تعداد لگاتار بڑھتی جا رہی ہے اور جلد ہی یہ 2000 پہنچنے والی ہے۔ تازہ ترین خبروں کے مطابق مہلوکین کی تعداد 1783 پہنچ گئی ہے جب کہ متاثرین کی تعداد 52952 بتائی جا رہی ہے۔ ان میں سے 15266 افراد ٹھیک ہو کر گھر پہنچ گئے ہیں۔

اجتماعی کوششوں سے اس کورونا کا ہوگا خاتمہ: پی ایم مودی
پی ایم نریندر مودی نے آج ملک سے خطاب کرتے ہوئے کہا کہ موجودہ حالات بالکل الگ ہیں اور ملک میں جاری کورونا بحران کی وجہ سے ویڈیو کانفرنسنگ کے ذریعہ ملک کے باشندوں سے خطاب کرنا پڑ رہا ہے۔ حالانکہ اجتماعی کوششوں کے بعد ہی ملک اس آفت سے باہر نکل پائے گا۔

دراصل آج کا خطاب پی ایم مودی نے بدھ پورنیما کی مبارکباد پیش کرنے کے مقصد سے کیا۔ انھوں نے اس موقع پر کہا کہ مجھے پہلے بھی اس موقع پر ملک کے باشندوں کے ساتھ بات چیت کرنے کا موقع ملا ہے، حالانکہ آج حالات بدلے ہوئے ہیں اور ایسے میں ہمیں کچھ عزائم کی ضرورت ہے۔

کورونا کے بڑھتے اثر کو دیکھتے ہوئے راجستھان حکومت نے ریاست کی سرحدوں کو کیا سیل
کورونا وائرس کا اثر دن بہ دن بڑھتا ہی جا رہا ہے۔ بے قابو ہوتے حالات کو دیکھ کر راجستھان حکومت نے ریاست کی سرحدوں کو سیل کرنے کا فیصلہ کیا ہے۔ راجستھان کی بین ریاستی سرحدوں سے لوگوں کا داخلہ روکنے کے لیے راجستھان کے وزیر اعلیٰ اشوک گہلوت نے فوری اثر سے ریاست کی سبھی بین ریاستی سرحدوں کو سیل کرنے کا فیصلہ لیا ہے۔